Plantun de Prouvènço

Pèr coumpara dos planto d'encò nostre

Tragopogon dubius & Bolboschoenus laticarpus

Coucourèu

Tragopogon dubius

Asteraceae Compositae

Àutri noum : Barbabou, Bouchino.

Nom en français : Salsifis douteux.

Descripcioun :
I'a quatre principalo meno de barbabou au nostre. An tóuti de lòngui fueio que dounon d'èr à-n-aquelo dóu pòrri. Aquéu èi de coulour jauno (ié dison pèr acò coucourèu) coume lou di prat. Pamens a un pecout boutis e mai boumbu que T. pratensis. Coumpara emé lou barbabou-de-prat.

Usanço :
Se dis "manja de barbabou" quouro se manjo pas gaire. Poudès pamens acampa li jóuini fueio pèr vosto ensalado champanello, lou goust es agradiéu e dous. Sa racino se manjo crudo vo cuecho, èi richo en inulino qu'ajudo à la digestioun (mèfi pamens pèr aquéli que ié soun alergi). Ei bon contro lis artèri tapado, la pisso-douço (diabèto) e l'ipertesuro.

Port : Erbo
Taio : Pancaro entresigna
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Tragopogon
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) flour : Pancaro entresigna
Flourido : Printèms - Estiéu - Autouno

Sòu : Ca
Autour basso e auto : Pancaro entresigna
Aparado : Noun
Remarco : Ensalado champanello

Liò : Champ - Prado umido - Mar
Estànci : Mesoumediterran à Mountagnard
Couroulougi : Pancaro entresigna
Ref. sc. : Tragopogon dubius Scop., 1772

Triangle(-di-làrgi-fru)

Bolboschoenus laticarpus

Cyperaceae

Àutri noum : Liandro, Triangle.

Noms en français : Scirpe à fruits larges, Souchet à fruits larges.

Descripcioun :
Aquéu triangle dóu gènre Bolboschoenus (planto nousado emé de lòngui fueio) trachis dins li canau, roubino e li limoun de ribiero. Fai gaire qu'es esta destria dóu triangle-marin en raport emé la formo de la grano qu'es eici mai larjo. Subretout vèn pas dins li relarg mounte i'a de sau au contro dóu marin. Lis espigo soun mai longo eici. Èi pu tihous de faire la diferènci emé Bolboschoenus glaucus ; pèr acò fau regarda la formo de la grano e l'espessour de l'"exocarpus" (pu grando eici). Coumpara emé lou triangle-verdau que ié sèmblo proun.

Usanço :
Se pòu gaubeja pèr la banastarié, mai avèn ges d'entresigne precis. Escriéure au site se n'en sabès mai. Li canard e lis auco manjon si boudougno.